ສາລີເປັນພືດເສດຖະກິດທີ່ຊາວກະສິກອນນິຍົມປູກກັນຫລາຍອີກຊະນິດຫນຶ່ງ, ເນື່ອງຈາກຜົນຜະລິດຂອງສາລີຈະມີລາຄາສູງ ແລະ ໃນປະຈຸບັນຍັງສາມາດນຳມາຜະລິດເປັນຫົວອາຫານສັດນັບວ່າເປັນພືດເສດຖະກິດທີ່ສຳຄັນຂອງປະເທດສະນິດຫນຶ່ງເລີຍກໍ່ວ່າໄດ້.
ປູກສາລີຖ້າຈະໃຫ້ໄດ້ຮັບຜົນຜະລິດດີຄວນມີເຕັກນິກຕາມວິຊາການແນະນຳວ່າ: ການກຽມດິນປູກສາລີຄວນເລືອກແບບທີ່ເຫມາະສົມກັບສະພາບຂອງດິນເປັນຕົ້ນແມ່ນການປູກພື້ນພຽງຄວນໄຖດ້ວຍຜານສາມ 1 ຄັ້ງ, ເລິກປະມານ 20-30 ຊັງຕີແມັດ ຕາກດິນ 7-10 ວັນ, ພວນດິນດ້ວຍຜານເຈັດ 1 ຄັ້ງ, ແລ້ວຍົກຮ່ອງປູກສູງ 25-30 ຊັງຕີແມັດ, ຖ້າປູກເປັນແຖວດຽວໃຫ້ມີໄລຍະຫ່າງລະຫວ່າງຮ່ອງ 75 ຊັງ ຕີແມັດ, ຖ້າປູກເປັນແຖວຄູ່ໃຫ້ມີໄລຍະລະຫວ່າງຮ່ອງປະມານ 120 ຊັງຕີແມັດ. ກໍລະນີປູກໃນຮ່ອງສວນແມ່ນໃຫ້ກວ້າງປະມານ 45 ແມັດ, ຕາມຄວາມ ຍາວຂອງພື້ນທີ່ໂດຍໃຊ້ຈວບ ຫລື ລົດໄຖເດີນຕາມເປີດຫນ້າດິນເລິກ 15-20 ຊັງຕີແມັດ, ຕາກດິນ 7-10 ວັນ, ຍ່ອຍດິນ ດ້ວຍແຮງງານ, ປັບລະດັບດິນ ໃຫ້ສະຫມ່ຳສະເຫມີແລ້ວຄາດເກັບເສດຊາກ, ຮາກ, ເຫງົ້າ, ຫົວ ແລະ ກ່າງຂອງວັດສະພືດຂ້າມປີອອກຈາກຫນານ.
ຕາມຫລັກວິຊາການຍັງລະບຸອີກວ່າການປູກສາລີດີແທ້ຄວນວິເຄາະດິນກ່ອນປູກຖ້າດິນມີຄ່າຄວາມເປັນກົດດ່າງຕ່ຳກວ່າ 5,5 ໃຫ້ຫວ່ານປູນຂາວໃນອັດ ຕາສ່ວນ 100-200 ກິໂລກຣາມຕໍ່ໄລ່ແລ້ວພວນດິນປົກ, ຖ້າດິນມີອິນຊີວັດຖຸຕ່ຳກວ່າ 1,5 ກ່ອນຈະພວນດິນໃຫ້ໃສ່ປຸຍຫມັກ ຫລື ຝຸ່ນຄອກທີ່ຍ່ອຍສະຫລາຍດີແລ້ວໃນອັດຕາສ່ວນ 500-1.000 ກິໂລກຣາມຕໍ່ໄລ່ ຫລື ຫວ່ານພືດບຳລຸງດິນເຊັ່ນ: ຖົ່ວຂຽວອັດຕາ 5 ກິໂລກຣາມຕໍ່ໄລ່ແລ້ວໄຖປົກໃນໄລຍະຕິດມານ ຫລື ຫລັງເກັບກ່ຽວຜົນຜະລິດຂອງພືດບຳລຸງດິນ.
ຊາວສວນ ຫລື ທ່ານໃດທີ່ມີຈຸດປະສົງຈະປູກສາລີໃຊ້ໃນຄົວເຮືອນ ຫລື ເປັນສິນຄ້າກໍ່ຕາມກ່ອນປູກທຸກຄັ້ງຕ້ອງຄົນແນວພັນດ້ວຍສານປ້ອງກັນກຳຈັດໂລຄານ້ຳຄ້າງຕາມຄຳແນະນຳສຳລັບການປູກພື້ນພຽງແນວພັນທີ່ມີຄວາມງອກສູງກວ່າ 85% ໃຫ້ຢອດ 1 ເມັດຕໍ່ຂຸມ, ໃຊ້ແນວພັນ 1,0-1,5 ກິໂລກຣາມຕໍ່ໄລ່, ຖ້າແນວພັນມີຄວາມງອກຕ່ຳ ກວ່າ 85% ຄວນຢອດເມັດ 1-2 ເມັດຕໍ່ຂຸມ, ໃຊ້ແນວພັນ 1,5-2,0 ກິໂລກຣາມຕໍ່ໄລ່, ອັດຕາປູກທີ່ເຫມາະສົມສຳລັບການບໍລິໂພກຫມາກສົດປະມານ 8.500 ຕົ້ນຕໍ່ໄລ່, ສຳລັບອຸດສາຫະກຳແປຮູບ 8.500-11.000 ຕົ້ນຕໍ່ ໄລ່. ຖ້າປູກເປັນແຖວດ່ຽວໃຊ້ໄລຍະລະຫວ່າງຂຸມ 25 ຊັງຕີແມັດ ຫລື ຖ້າປູກເປັນແຖວຄູ່ໃຫ້ປູກຂ້າງສັນຮ່ອງແບບສະຫລັບພັນປາໃຊ້ໄລຍະຫ່າງລະຫວ່າງຂຸມ 25-30 ຊັງຕີແມັດ, ເມື່ອສາລີມີອາຍຸປະມານ 14 ວັນຖອນແຍກໃຫ້ເຫລືອຂຸມລະ 1 ຕົ້ນ. ສ່ວນປູກໃນຮ່ອງສວນໄລຍະປູກ 50x50 ຊັງຕີແມັດ, ເຮັດຂຸມປູກ ເລິກ 35 ຊັງຕີແມັດ ຢອດເມັດຈຳນວນ 2-3 ເມັດຕໍ່ຂຸມ ແລ້ວປົກດ້ວຍດິນ, ເມືອສາລີມີອາຍຸປະມານ 14 ວັນ ໃຫ້ຖອນແຍກເຫລືອ 2 ຕົ້ນຕໍ່ຂຸມ ຈຳນວນ 6.500-8.500 ຕົ້ນຕໍ່ໄລ່.
ສາລີພາຍຫລັງຜ່ານຂັ້ນຕອນ ການປູກແລ້ວຍັງຕ້ອງການການດູແລຮັກສາ, ການໃສ່ປຸຍ: ຄັ້ງທີ 1 ເພື່ອຮອງກົ້ນຮ່ອງພ້ອມປູກໃນອັດຕາສ່ວນ 60-80 ກິໂລກຣາມຕໍ່ໄລ່ ແລະ ຄັ້ງທີ 2 ເມື່ອສາລີອາຍຸໄດ້ 20 ວັນໃຫ້ໃສ່ປຸຍໃນອັດຕາ 60-80 ກິໂລກຣາມຕໍ່ໄລ່, ໂຮຍຂ້າງຕົ້ນ ຫລື ຂ້າງແຖວແລ້ວພວນດິນປົກ, ກໍລະນີທີ່ມີການລະບາຍນ້ຳດີ ແຕ່ສາລີມີລັກສະນະຕົ້ນເຕ້ຍ ແລະ ໃບເຫລືອງຄວນໃສ່ປຸຍໃນອັດຕາ 2 ກິໂລກຣາມຕໍ່ໄລ່, ເມື່ອສາລີອາຍຸໄດ້ 40-45 ວັນ.
ບໍ່ພຽງແຕ່ເທົ່ານັ້ນສາລີຍັງຕ້ອງການນ້ຳເພື່ອເພີ່ມຄວາມຊຸ່ມຂອງດິນເຖິງແມ່ນວ່າຢູ່ບ້ານເຮົາປົກກະຕິຈະອາໄສແຕ່ນ້ຳຝົນກໍ່ຕາມແຕ່ໃນຫລັກວິຊາການແນະນຳວ່າ: ຕົ້ນສາລີເຮົາສາມາດໃຫ້ນ້ຳໄດ້ທັງແບບຕາມຮ່ອງ ຫລື ແບບພົ່ນຝອຍ ເຊິ່ງຈະປະຢັດກວ່າການໃຫ້ນ້ຳແບບຕາມຮ່ອງການໃຫ້ນ້ຳແບບພົ່ນຝອຍຄວນໃຫ້ 7-10 ວັນຕະຫລອດລະດູປູກ ສ່ວນການໃຫ້ນ້ຳຕາມຮ່ອງຄວນໃຫ້ນ້ຳສູງເຖິງລະດັບເສດ 3 ສ່ວນ 4 ຂອງຮ່ອງ, ເພື່ອໃຫ້ເມັດ ສາລີງອກສະຫມ່ຳສະເຫມີຫລັງຈາກນັ້ນໃຫ້ນ້ຳທຸກ 3-5 ວັນ. ສຳລັບດິນລ້ວນ ຫລື ດິນປົນຊາຍ, 7-10 ວັນ ສຳ ລັບດິນຫນຽວປົນຊາຍ ບໍ່ຄວນໃຫ້ນ້ຳຖ້ວມຂັງໃນຫນານດົນເຖິງ 24 ຊົ່ວໂມງ ເພາະສາລີຈະຢຸດການຈະເລີນເຕີບໂຕ ແລະ ຜົນຜະລິດຈະຫລຸດລົງ ຫລື ອີກວິທີຄືໃຫ້ນ້ຳໃນຮ່ອງສວນຄວນໃຫ້ນ້ຳໂດຍການຕັກນ້ຳສາດໃສ່ ຫລື ໃຊ້ເຄື່ອງສູບນ້ຳວາງໃນເຮືອຂະຫນາດນ້ອຍແລ້ວສູບນ້ຳໃນຮ່ອງໃສ່, ຄວນໃຫ້ນ້ຳທັນທີຫລັງປູກ ແລະ ຫລັງໃຫ້ປຸຍທຸກຄັ້ັ້ງ, ຖ້າໃບສາລີຫາກຫ່ຽວ ຫລື ໃບມ້ວນໃນຕອນເຊົ້າ ຫລື ແລງສະແດງວ່າຂາດນ້ຳ, ຕ້ອງໃຫ້ນ້ຳທັນທີແຕ່ຄວນລະວັງຢ່າໃຫ້ຂາດນ້ຳໃນໄລຍະປະສົມເກສອນ ແລະ ຕິດເມັດເພາະຈະເຮັດໃຫ້ຜົນຜະລິດຫລຸດລົງຫລາຍ.
ສຳລັບວິທີການເກັບກ່ຽວສາລີແຕ່ລະພັນແມ່ນມີອາຍຸການເກັບກ່ຽວບໍ່ເທົ່າກັນໂດຍທົ່ວໄປສາລີມີອາຍຸການເກັບກ່ຽວລະຫວ່າງ 100-120 ວັນ, ສ່ວນການເກັບກ່ຽວຄວນເກັບເມື່ອສາລີແກ່ເຕັມທີ່, ກາບຫຸ້ມມານແຫ້ງ, ໃບແຫ້ງເຊິ່ງເມັດຄວນມີຄວາມຊຸ່ມບໍ່ເກີນ 30% , ເຊິງການເກັບກ່ຽວອາດຈະເຮັດໄດ້ທັງໃຊ້ແຮງງານຄົນ ຫລື ໃຊ້ເຄື່ອງຊ່ວຍເກັບກ່ຽວ